Health Minister Lalrinliana Sailo chuan Aizawl Civil Hospital chei thatna atana central a sum dil Rs. vbc 54.23 zingah Rs. vbc 16.50 release tawh a nih thu a sawi a, amaherawhchu, Rs. vbc 16 chuang release tawh-ah hian Rs. vbc 10 bak hmuh theih a nih tak loh avangin a bak chu khawiah nge a awm tih hi ‘Kan zawng hle dawn a ni’ tiin vawiin Assembly Session-ah House a hrilh.

 

 

Congress MLA John Siamkunga zawhna chhangin Health Minister chuan, Aizawl Civil Hospital chu tih changtlun (up grade) tum a nih thu a sawi a, heng bakah hian District Hospital hrang hrang, Lunglei, Champhai, Lawngtlai, Saiha, Mamit, Kolasib, Serchhip leh Hnahthial Hospital te chu tih changtlun tum a nih thu a sawi bawk.

TT Zothansanga zawhna chhangin Lalrinliana Sailo chuan, Champhai Civil Hospital sak thatna turin Rs. vbc 26.43 rua-hman a nih thu a sawi a, chuta tang chuan Rs. vbc 1.5 release tawh niin Rs. nuai 81.60 chu consultation fee atan pek a ni tawh tih a sawi bawk.

MNF member C.Ramhluna zawhna chhangin Health Minister chuan, Health & Family Welfare Department hnuaiah Super Specialist Doctor 3, Cardiology-ah 1, Oncology-ah 1 leh Urology-ah 1 an awm tih a sawi a, pakhat chu deputation in NEIGHRIMS, Shillong-ah a thawk tih a sawi bawk.

Zawhbelhna chhangin Minister chuan sorkar hmasa hunlai September 2008-a Regulation 3F-a doctor 66 lak te chu dah ngheh tuma hmalak mek a nih thu a sawi a, amaherawhchu, heng mite regularise tur hian form C a effect zel a, chu chuan Service Rules a nghawng zel bawk avangin buaipui tur a thahnem hle tih House a hrilh. NRHM hnuaia doctor lak tur mi 28 zinga 4 chauh an hmuh avangin doctor indaihlohna a nasa hle tih sawiin, hei vang hian heng mite hlawh tihpun dan tur pawh hi ngaihtuah mek a nih thu Minister chuan a sawi bawk.

Law Commssion Chairman R.Lalrinawma zawhna chhangin Minister chuan, Regulation 3F chu rikrum thil (emergency) entirnan: Lirnghing, leimin, tuilian etc. awm thulha hmanhmawh taka lak tur a nih laiin, Ministry hmasain he dan hmanga doctor a lak lai hian election emergency a nih ngawt loh chuan emergency dang a awm an hriatloh thu a sawi a ni.

Tunah hian Mizoramah recognised hospital 14; Presbyterian Hospital, Durtlang; Serkawn Christian Hospital, Lunglei; Greenwood Hospital, Aizawl; Bethesda Hospital & Research Centre, Bawngkawn; New Life Hospital, Chanmari; Mizoram Health Care, Diagnostic & Research Centre, Dawpui; Nazareth Medi-Tech Diagnostic & Care Centre, Ramhlun North; Grace Nursing Home & Research Centre, Zarkawt; Aizawl Hospital & Research Centre, Mission Veng; Lairam Christian Medical Centre, Lawngtlai, Vaivenga Hospital & Research Foundation, Aizawl te an awm thu PP Thawla zawhna chhangin Health Minister chuan House a hrilh.

Saiha Civil Hospital Main Building chu sak that tum niin khum 100 awm thei turin DoNER-a thehlut turin State Planning Board-ah thawn a ni tawh tih MInister chuan a sawi.