YMA Sub-Hqrs., Mamit Co-ordination Committee chuan Bru Baptist Church din fel tawh chu hnam inpumkhatna tichhe thei nia ngaiin, titawp tura Kohhran thuneitute ngen an rel.

 Hmun danga din tumna awm mek chu he district chhhung, Mamit leh Hachhek Constituency-a Tuikuk hmun khata an awmkhawmna theihna tur niin an hria a. Tripura lama Bru raltlan inti te Mizoram-a an kir leh hunah pawh Bru te hian he Kohhran hi belin hmun khata awmkhawmna remchang, Politics takin an zawng ru a ni thei, tiin thudawnna chuan a sawi.

 "Baptist Kohhrana an awm hi tha kan ti lo ni lovin, Hnam/chi bil anga Kohhran din hi tha lovin kan hria a ni. An chanchin chhuiin he thil hi hlawmkhata Bru te an awm theihna tur niin kan hria a. "Mamit District-ah hian Tuikuk MLA an awm mai te pawh kan hlau a ni," tiin thudawnna pakhat chuan a sawi bawk.

 YMA Sub-Hqrs. Mamit hian Bru Baptist Church hi uluk taka thlirin, chibing leh hnam bil inlak hranna a thlen thei dawn nia an ngaih thu leh Mamit District chhunga hnam inpumkhatna tichhe thei dawna an hriat thu sawiin, sût leh turin BCM thuneitu sanga thlen nise tih chu an thutlukna a ni ta a ni.

 Rosanga, Secretary, YMA Sub-Hqrs., Mamit chuan he an thurel hi Baptist Church of Mizoram hruaitute hnenah thlen nise an ti a. Mahse, Mamit lamah power supply an neih that loh avangin official-in an ngenna hi an la pe rih lo a, Central YMA pawh thuphungin an hrilh tawh tih The Zozam Times a hrilh.

 Baptist Church of Mizoram hian kumin Assembly-a an lo rel tawh angin Bru Baptist Church hi Damparengpui-ah hian din tawh a, Putlungasih leh Nghalimlui-ah din an la tum mek niin thudawnna chuan a sawi. Hetianga Bru hnam hminga Kohhran a din takah hian campaign-a chhuakin Baptist Kohhran chu an awmna tur a nih thu Kohhran danga awm mekte-ah hrilhin campaign a awm tih thudawnna chuan a sawi bawk.

 Hemi chungchangah hian BCM Gen.Secretary Rev. Dr.K.Thanzauva chuan, Bru-te zingah hian Baptist kohhran chuan hun rei tawh tak atangin rawngbawlna a lo kalpui tawh tih a sawi a. Tun dinhmunah chuan mahni kea ding thei tawhah Kohhran rorelna sang chuan a ngaih avangin indantir tha a ti a, hei hi kohhran rawngbawlna kalphung pangngai a ni a, politics lam nen inkaihhnawihna a nei lo, a ti ve thung.

 Central YMA chuan YMA Sub-Hqrs., Mamit thurel hi karleh thawhtanni-a CEC meeting-ah an sawi mai thei tih thu dawn a ni.