Mizoram sorkar chuan Taxi neitu zawng zawngte chu sorkar duhdan ang leh permit an dil laia ziaka an intiam anga service chhunzawm turin September ni 17, 2009 zing lam thlengin hun a pe a. Hemi an zawm lo a nih chuan a tul anga thuneihna hman a nih tur thu a hriattir.

 Nimina Mizoram sorkar thuchhuah chuan Taxi intlanhhawk tura sorkarin ruahmanna a siam duh lova Taxi te nawrhna belhchhah tura City Bus service te tihtawp a ni ve leh ta chu pawi a tiin, Mizoram Road Transport Union (MRTU) ten Maxi Cab leh Sumo service zawng zawng tihtawp vek tuma ruahmanna an siam chu, mipui tana harsatna siam leh sorkar tihbuai tumna niin sorkar chuan a ngai, a ti.

 Hetih lai hian mipuite harsatna chhawk zangkhai a nih theih nan sorkar chuan theihtawp chhuaha hma a lak mek thu leh, department hrang hrang Bus leh MST Bus te nen Bus 50 zet Aizawl khawpui chhungah tlantir mek an ni a, heng bak pawh hi a tul a nih chuan mimal motor neitute thahnemngaihna pawh ngen zel a ni dawn tih nimina Mizoram sorkar thuchhuah chuan a tarlang a. "Nawrhna nena sorkar nawr mekte hian sorkar thu awiha an service an chhunzawm hma chuan eng-mah ngaihtuah theih a ni lo," tiin State Transport Authority chuan hriattirna a tichhuak bawk.

 Transport director Siamliana chuan nimin khan MRTU hnenah lehkha thawnin, Taxi intlanchhawk chungchanga buaina in City Bus a kan kai daih dan chu hriatthiam harsa tak a nih thu te, September ni 13, 2009-a MRTU memorandum, Chief Minister hnena thehluhah Traffic SP in Taxi te intlanchhawk tura hriattirna a tihchhuah sut tur leh, sut a nih loh chuan a tul anga hma lak zel a nih tur thu tein sorkar chu an vaukhan tih a tarlang a. "In rawtna te hi tha tak tak awm bawk mahsela, invaubehna leh mipui tana in tangkaina denhhena hma in lak luih zel avang hian sorkar chu ngawi mai thei lovin in siam ta a ni," a ti.

 Transport director chuan SP, Traffic Notification, September ni 11, 2009 anga an service chhunzawm tur leh, hemi bawhchhiate chu an chungah dan anga sorkarin thuneihna a hmang a nih pawhin, motor neitu leh a khalhtu driver te ngei pawhin mawh an phur tih a hriattir tih a talrang a ni.

 MRTU hian nimin khan executive meeting neiin, Chief Minister hnena memorandum thehluta, Taxi te group 5-ah thena kar khatah Taxi vawikhat chawlh an rawtna chu an dinna a la ni reng tih an sawi a. Sorkar thuchhuak chhangletin, MRTU in palai hna a thawh kal zelah CM hnena rawtna an thehluh chu thil tihfel harsa nia an hriat loh thu leh, hei hi tihfel theih a nih loh chuan MRTU hmalakna chu a la kal zel rih tawh tih Transport Secretary hnenah ziakin an thlen veleh a ni.

 Lalbiakzama, SP, Traffic chuan Taxi intlanchhawk tura ruahmanna siam duh lova buaina siam an awm a la hriat loh thu leh, nimin thleng khan tumah man an la neih loh thu a sawi a. “Driver tam tak chuan service lova din reng hi an ning tawh”, a ti a. “Mi tam takin sorkar chu hnung tawlh lova a dinna ngaia ding tlat tura ngentu pawh an awm reng a ni”, a ti bawk.

 Hetih lai hian,vawiin atanga Maxi Cab te pawh tlan lo tur anga puanzar tawh chu, nimina Mizoram Maxi Cab Owners Association executive meeting chuan ticket lo la lawk tawh an awm avangin vawiin chuan an tlan leh phawt ang a, hemi hnu lama an kal zel dan tur chu an la rel leh dawn niin thudawnna pakhat chuan a sawi.

 September ni 14 atanga tiamchin awm lova Taxi an tlan loh chu niminah pawh zawm a la hlawh viau a, hmun thenkhatah Taxi tlanchhuak pahnih khat a awm thung. Nimin atang khan City Bus te pawh an chawlh zui tak avangin Aizawlah nunphung a khaihlak a, sorkarin department bus 50 rual zet a tlantir chung pawhin nimin tlai thimhlimah te pawh khan school naupang ke-a haw hmuh tur tamtak an awm a ni.

Aizawl Mission Venga Gospel Centenary School chu hmun hla tak tak atanga kal engemawzat an awm a, nu leh pa lo inring hman lo an tam avangin nimin khan school pumpui chu an chawlh phah tih he School principal chuan The Zozam Times a hrilh a. Vawiinah lamah erawh chuan dan pangngaiin school hi an kal tan leh dawn tih a sawi.