Mizo sex video hriat chian 70 zirchianna atanga a lan danin 62.85 % te chuan anmahni duh thu renga an inlak a ni a, 37.14% chuan an khawsak dun laiin mipa-in thla a la a ni tih hmeichhiaten an hre lo.

   

Mizoram Synod, Social Front buatsaihin vawiin khan sex video leh zahmawh rawngkai hluar zel chhan chungchang zirho a ni a. He zirhona-ah hian Vanlalrema Vantawl, Editor, Zalen leh Laltlansangi Fanai, Master in Criminology te zirchianna paper chu zirho niin, zirchianna atanga a lan danin Mizo sex video zing-ah hian pawngsuala chhal ngam 6 a awm niin an sawi.

Zirchiangtuten nawhchizuar 36 an kawm zinga 16.66 % chu part time a inzuar niin, tum khata Rs 2000-3000 in an dawr thin a, 83.34% chuan eizawnnan tak tak an hmang a, phone hmanga koh chhuah theih niin, vawi khat kawm manah Rs 500 an in-chhiar tlangpui thin.

Kristian thalaite ngaihdan lakah chuan 83% in Mizo thalaite chu sex-ah an inhmang nasa hle niin an hria a, 56 % in sex a thalaite hruai luttu chu information technology hmasawnna vang-ah an ngai a, 60% in zu leh drugs chu sex a thalaite hruai luttuah an ngai bawk.

C. Lalramzauva, Advocate chuan, ‘Mipat hmeichhiatna leh saruak thlalak chungchang leh dan inkaihhnawih dan’ tih chungchang a sawi a.Dr Robert S. Halliday, Coordinator, Synod Social Front chuan, ' Aizawl thalaite zinga sex hluar dan chhui-chianna’ chungchang a sawi bawk.

He Seminar, Synod Conference Centre-a neihah hian khawpui chhung KTP aiawh mi 98, kohhran aiawh mi 106 leh sawm bik mi 38 an tel a ni.