Industry department hnuai atanga department hrana indang tur, Geology & Mineral Resources Department-a a hotupa ber (director) post chu IAS luah tura rua-hman nia thu dawn a ni.

 

August ni 3, 2010-a cabinet mee-ting in a lo pawm tawh angin Geology and Mineral Resources Department director hi IAS post tura ruahman a ni a, hei hi Geology & Mining hnuaia hnathawkte chuan tha an ti lo hle nia thu dawn a ni.

The Zozam Times-in thu a dawn danin Geology hi technical subject satliah mai ni lovin, highly technical subject a ni a, hemi enkawl tur hian technical mi ngei an awm loh chuan administration leh hnathawhna kawng hrang hrangah harsatna an tawk thei dawn nia hriat a ni.

He department thara technical mi ni lo dah tum a nih chungchangah hnathawktu thenkhat chuan, khawi hmunah mah Geology & Mining lam enkawl tur hian IAS an dah ngai loh thu leh technical department a nih angin technical lama hriatna nei leh mithiam ngeiin enkawl thei se an duh thu an sawi a. A lungawi lo zawnga sorkar nawr an tum loh thu an finchhuahna a zarah sorkar pawhin technical mi ngei a dah an beisei thu an sawi.

He department thar piang tur hian sorkar-in order a la chhuah lo nia hriat a ni a, order chhuahin department puitling angin function pawh nise, tuna ruahman ang chuan hma an sawn thei tak tak dawn chuang lo niin thudawnna pakhat chuan a tarlang a ni.

 

Technical department dang, Public Works Department, Public Health Engineering, Power & Electricity, Information and Communication Technology leh a dangah te chuan a hotu ber (director/ engineer-in-chief) te chu technical mi an nih thu leh department thenkhat phei chu an secretary thlengin technical mi an ni a. Tunlai khawvela technical department pawimawh leh lian ber zinga chhiar theih Geology enkawl tura IAS dah chu a fuh lo hle niin thudawnna pakhat chuan a sawi bawk a ni.

 

---------------------------

 

Geological Survey of India (GSI) chuan Aizawl-ah Field Training Centre (FTC) din a tum a, hemi dinna atan hian Industrial Growth Centre ram thenkhat sahthlak tum mek a ni. He centre-ah hian Geology lam thil hrang hrang kum khatah vawi khat training pek thin a ni ang a, centre dinna tur senso zawng zawng leh staff-te hlawh chu GSI hian a tum vek dawn a ni.

Mizoramah oil leh gas zawnchhuah hna thawh mek a ni a, Mizoram hi block 4-ah then niin heng block te hi Oil and Natural Gas Corporation (ONGC), Oil India, Reliance ten an insem a. ONGC area chhung, Hortoki-ah chuan hmun 3-ah oil leh gas a awm thei tih hriat (identify) a ni tawh.

Oil leh gas laihchhuah atang hian state sorkar-in royalty atan 12.5% a la dawn a. Tunah hian oil leh gas atanga hlawkna hi state leh central-in 50-50-a an insem theih nan Finance Commission Recomendation a awm mek a. Hei hi ti hlawhtling tur chuan state sorkar leh MP te an pawimawh hle nia sawi a ni.