Thirteenth Finance Commission-in Mizoram sorkar hnena kum khat chhung atana sum a pek tura a ruahman, a thawhkhatna (first installment) atan tunhnai khan Minis-try of Finance chuan Rs. nuai 2092.7 a rawn release a, he sum hman dan tur (guidelines) erawh Ministry hian a la siam lo nia thu dawn a ni.

 

Ministry of Finance hian kum 2010-11 chhunga Mizoram sorkar hnena sum a pek tur zinga a thawhkhatna (first installment) chu July ni 15 khan a release a, hetah hian Panchayati Raj Institution (PRI), Urban Local Bodies (ULB) leh Special Area Basic Grant atan Rs. nuai 1466; State Disaster Response Fund (SDRF) atan Rs. nuai 385; Elementary Education atan Rs. nuai 100; BPL te tana Unique Indentification siamna atan Rs. nuai 12 leh Improvement in Delivery of Justice atan Rs. nuai 129.70 te a ni.

Mizorama PRI nodal department chu Local Administarion Department (LAD) an ni a, anni hian kumin chhunga an sum hmuh tur first installment atan Rs. nuai 939 an dawng a, ULB nodal department chu Urban Development & Poverty Allevation (UD & PA) niin anni hian first installment atan Rs. nuai 437 an hmu a ni.

Special Basic Area Grant (SPAG) hian Mizoram chhunga Autonomous District Council pathum leh Sinlung Hill Development Council te a huam a, hengho tan hian first intallment atan Rs. nuai 90 release a ni bawk.

SPAG te sum hmuh hmasak Rs. nuai 90 hi kumin chhunga an sum hmuh tur 50% a ni a, heng sum hi Mizoram sorkar, Finance department chuan July ni 23 khan a thliar hrang leh a, chuta a ruahman dan chuan Lai Autonomous District Council-in Rs. nuai 30, Mara Autonomous District Council-in Rs. nuai 27.5, Chakma Autonomous District Council-in Rs. nuai 22.5 leh Sinlung Hill Development Council-in Rs. nuai 10 te an chang ang.

Central-in heng sum a rawn release te hi a kalna tur nodal department/ agency theuh account-ah ni 15 chhunga thun tura tih a ni.

‘Central hian sum a rawn release tawh nain, kum dang ang lo takin a hman dan tur (guideline) hi Ministry of Finance hian a la peih si lova, chuvangin heng sum kan hmuh hi kan lo hmang ngawt ngam lo a, guidelines lo thlen hun kan nghak mek a ni,’ tiin Mizoram Finance Secretary Lalmalsawma chuan The Zozam Times zawhna chhangin a sawi.

Tarlan tawh angin 13th Finance Commission hian kum 5 chhunga Mizoram sorkar sum hman tur atan Rs. vbc 8805.3 a ruahman (earmark) a, heng zingah hian inrelbawlna (local bodies) hrang hrang atan Rs. vbc 310.7, chhiattawhna hrang hrang thlipui, tuilian, lirnghing etc. atan Rs. vbc 47.5 leh naupang zirna (elementary education) atan Rs. vbc 5 a ruahman a ni.

Tuna sum la release ve loh zing-ah chuan PHC leh Sub-Centre sakna tur te, ramri hrula police station sakna tur te, New Secretariat Complex sak belhna tur te, Raj Bhavan sakna turte leh thil dang tam tak a la tel lova, a tahtawla release zel tur a ni.