Sairang VC te chuan Chaltlang nena thlanmual ram an inchuh chungchangah, an inkara harsatna siamtu chu Land Revenue and Settlement department leh a changtu minister a nih thu an sawi.

 

 Sairang VC leh YMA te hian vawiin khan Aizawl Press Club-ah chanchinthar lakhawmtute kawmin, tunhnaia Chaltlang khawtlang nena thlanmual ram tur an inchuhna chungchangah Chaltlang YMA chuan sorkar atanga pass mumal tak an neih avangin an tih tur dik tak an ti nia an ngaih thu an sawi a. Hetih lai hian ram inchuh mek a awm lai kara pass lo petu Revenue Minister thiltih dan chu mak an tih thu an sawi.

Chaltlang nen thlanmual ram an inchuh avangin sorkar-in thlanmual ram a pek list chu RTI hmangin an dil a, May ni 24-a chhanna an dawnah chuan Chaltlang tan thlanmual ram pek a awm loh thu leh pending proposal-ah pawh engmah a awm lo niin Sairang VC te chuan an sawi.

RTI-a an zawhna chhan a nih hnu July ni 2 khan Revenue Department chuan Chaltlang hnenah thlanmual ram pass chu a pe leh si nia sawiin Sairang VCP Vanchungnunga chuan, ‘RTI zawhna kan chhang zo tawh bawka ‘Chaltlang hi pass i pe tawh mai ang u,’ an tihna-ah kan ngai a ni,’ a ti.

Sairang chu hmanlai atangin Lal pathumin an awp rawn a nih thu Sairang VC te chuan an sawi a, Chaltlang Lal chu an lal a nih ve tho thu leh Chaltlang ram chhunga awm ve mai niin ram indil tawn kher a ngaih loh thu an sawi a. Hetih laia thlanmual ram atana Chaltlang leh Sairangin an ram inchuh lai ber kher Revenue department-in Chaltlang tana pass a lo pe chu mak an tih thu an sawi.
Sorkar-in Chaltlang tana ram a pek bul lawkah ram ruak a la awm tih sawiin Sairang VC te chuan, ‘Sorkar hnenah thlanmual hmun tur hi kan dil vein kan ring a, min pek ngei pawh kan ring a ni,’ an ti.