Mualpui-a Rajiv Gandhi Stadium sak mek chu chak taka kalpui mek niin, hemi atan hian Planning Commission-ah Mizoram sorkar chuan ‘Additional Assistance’ cheng vaibelchhe 70 a dil belh mek tih chief minister Lal Thanhawla chuan a sawi.

 

 Rajiv Gandhi Sports Stadium sak mek hi Lal Thanhawla hian vawiin  khan tlawhin, he stadium chungchangah hian UPA chairperson Sonia Gandhi leh sorkar laipui thuneitu pawimawh dangte nen inbiakna hlawhtling tak an neih tawh tih a sawi a. Mizoramin hmun leh hmanrua te a nei changtlung lo chung pawha Mizo infiammite hlawhtlinna leh thlen chin chu a chhuanawm takzet a ni, a ti.

Commonwealth Games vawi 19-na Delhi a neih tur chu India ram sport chanchina thil chhinchhiah tlak a nih thu leh, hlawhtling taka India-in a thlen tur thu a sawi a. Mizoram sorkar pawhin Mizo thalai infiammite thiamna leh theihnate khawvel hriata phochhuah ngei a duh a, chu mi atan chuan sorkarin theihtawp a chhuah zel dawn a ni, a ti bawk.