Tunhnaia tualchhung chanchinbu pakhata ' Short Term Degree Course’ tia advertisement langah chuan thil dik tawk lo a awm nia ngaiin Mizo Zirlai Pawl (MZP) chuan vawiin khan Aizawl SP hnenah FIR an thehlut.

 

He advertisement chhuahtu ten kum khat chhunga short term degree course correspondence hmanga BA, B.Ed, B.Com, MA, M.Com, MSW te zir theih anga a chhuah chu The Global Open University, Nagaland prospectus nen inmillohna tam tak MZP chuan a awm tih an hmuchhuak a, he University hnuaia affiliated college nia sawi ‘Sree Sankara College’ pawh a awm ngei leh awm loh an chhui mek tih an sawi. Admission hawngtuten course fee structure an tarlannaah leh admission form-a college hming inziah dan pawh a inmilloh thu an hmuchhuak tih an sawi bawk a, hei vang hian chhuichiang turin MZP chuan police te an ngen a ni.