Forensic Science Laboratory chuan pawi-khawihna leh forensic expert tel ngaihna thil chi hrang hrangah kumin January thla atanga June thleng khan case 225 an dawng tawh a, heng zinga 204 chu an chingfel tawh a. Pawikhawihna hmun 80-ah koh an nih angin an kal tawh bawk.

 

FSL hotute chuan pawikhawihna a thlenna hmunah koh an nih angin pawikhawihna chhuichhuahna tur kawnga 'evidence' awm thei te lakkhawm chu an hna a ni a, a case azirin rang taka hmuhchhuah theih a ni vek lo tih an sawi. An hmuchhuak a nih pawhin an report chu mipui hriatah an puangzar ngai lo tih sawiin, ‘Magistrate, ukil leh police hotute bakin an hre ngai lo a, kan report hi puanzar a nih ngai loh avangin 'enge maw an tih ve ber le' tia min sawi tawk pawh an awm thin reng a ni,’ tiin Forensic Science Laboratory wing-a deputy director T. Lalropuia chuan a sawi.

‘Pawikhawiha puh kha a nih lohna kan finfiah pawhin anmahni tan achievement ropui tak a ni a, pawikhawihtu an nihzia kan finfiah pawhin a chhuitu police te tan achievement ropui tak a ni leh a, a eng zawng pawhin achievement ropui tak chu a ni ve ve ah kan ngai,’ FSL Dy. Director chuan a ti.