Monday 06th of September 2010
Home 
News Central-in a pawm tawh Sainik School dinna atan PWD-in DPR la siam zo lo
|
Central-in a pawm tawh Sainik School dinna atan PWD-in DPR la siam zo lo |
|
Written by Editor
|
|
Tuesday, 27 July 2010 16:40 |
|
DPR siam muan vangin hmasawnna hnathawh a muang
Central sorkar leh DoNER Minister BK Handique ten an remtih tawh, Rs. Vbc 82.89 senga din tur Chhingchhipa Sainik School sakna atan Mizoram sorkar, Public Works Department chuan Detailed Project Report (DPR) a la siam peih thei lo nia thu dawn a ni.
Ministry of Development of North East Region (DoNER) hian Non-Lapsable Central Pool of Resources (NLCPR) hnuaiah kum 2010-2011 atan hian Mizoram tan project 2 pawm (retain) a nei tawh a. Chungte chu Rs. vbc 10.34 senna tur Tuipang Water Supply Scheme leh Rs. vbc 82.89 senna tur Chhingchhip-a Sainik School dinna tur a ni. Mizoram State Planning Board atanga thu dawn danin, Tuipang Water Supply Scheme atan hi chuan PHE department-in DPR a siam fel tawh a, chu chu DoNER-ah thawn thlak a ni tawh. Hetih lai hian Chhingchhip-a Sainik School dinna atana PWD in DPR a siam chu a tha tawk lo nia Planning Board-in a ngaih avangin tunah hian siam that tir leh mek a ni a, an la siam zo lo a ni.
Sainik School dinna tur hian DoNER hian Rs. vbc 82.89 a phal a, hetih lai hian 13th Finance Commission pawhin he school vek dinna atan hian Rs. vbc 50 a phal bawk a. DoNER sum ruahman hi a tam zawk avangin he school sak nan hian hman zawk tum a niin, Finance Commssion in Rs. vbc 50 a ruahman hi ‘divert’ theih a nih bawk si loh chuan engtianga hman tangkai tur nge ni ang tih sorkarin a la ngaihtuah fel lo bawk.
Mizoram sorkar hnuaia department hrang hrangin, DoNER leh NEC-a project lian tak tak an thehthlak, Ministry lam pawhin a pawm tawh leh sum pawh a chhehhran (retain) tawh, department lamin DPR hmanga a vawm zui loh leh a bawhzui loh tam tak a awm niin thudawnna chuan a sawi a, hengte hi bawhzui ni hlawm se chuan Mizoram hmasawnna hna-thawhna tur sum tam tak a awm thei dawn nia sawi a ni.
Project pawm tawh leh hnathawh mek thenkhat, utilisation certificate, thlalak, work complete certificate leh thil dang thehluh that loh avanga project khaihlak ta pawh tam tak Mizoramah a awm a, hemi kawngah hian sorkar officer ten nasa lehzuala tan an lak a pawimawh hle niin mithiamte chuan an sawi.
Mizoram hmasawnna atana sum release pawh a chaklo hle a, kumin chhung hian NEC chuan Saitual leh Phullen inkar kawng siamthat (upgrade) na atana sum a release tih loh chu project lian tham atan sum release a la awm lo. He kawng Km 60 a thui tih changtlunna atan hian NEC chuan Rs. vbc 55.34 a ruahman a, hetah hian NEC chuan Rs. vbc 43.93 release tawhin state in Rs. vbc 4.33 a release tawh a, tunhnaiah khan NEC chuan Rs. vbc 8 chu hemi atan hian a release leh a, hei bak hi sum lian tham release a la awm lo.
Central sorkar-in a thuphunga a pawm tawh, Mega Food Park leh Modern Abatoir sakna tur DPR?pawh tun thlengin la peih fel a ni lo nia thu dawn a ni a. NLCPR hnuaia Vanapa Hall sak thatna tur Rs. vbc 50 dil tawhah Rs. vbc 25 chauh DoNER hian hman a phal avangin Vanapa Hall sak thatna tur sum a awm rih lova. A thuphunga Rs. vbc 25 hman a phal hi hmang tangkai turin DPR siam a la ni lova, Hall dang sakna tur hian a hmun tur tihfel theih a la nih loh avangin DPR hi siam theih a la ni lo nia thu dawn a ni.
|
Copyright @ The Zozam Times.
