Lalpiangliana thihna chungchanga police 7 man tawh, an hrisellohna chhuanlam avanga court-in interim bail a phalsak tak te medical certificate petu doctor thenkhat chuan, he case-a inhnamhnawih an ni tih an hriat lohva an pek niin an sawi.

 

Heng police 7 te hian doctor hrang theuh hnen atangin medical certificate hi an nei a. Pumpui lawng, zunthlum, kal tha lo, pumna etc. chhuanlamtein medical certificate hi an dil a ni.

The Zozam Times in medical certificate petu doctor thenkhat a biakpawh te chuan, anmahni hnena certificate diltute chu he thihna-a inhnamhnawih an nih leh nih loh an hriat loh thu te, chawlhlak an dil duh avanga zunthlum ni anga insawi, exam lem lova an lo pek mai te leh thenkhat chu clinic-a an lo exam ngei te an awm niin an sawi a. Hetihlai hian Jail-a tan lohna tur khawpa natna benvawn emaw leh khirhkhan nei an awma an hriat loh thu an sawi a ni.

Doctor thenkhat chuan medical certificate pek kawngah an fimkhur tawh hle tih sawiin, Aizawl Civil Hospital phei chu an fimkhur avangin Medical Superintendent countersign kher an phut tawh niin an sawi.

He thihna chungchanga interim bail la mek police 7 te hi thla khat hnu-ah Court-a inlan leh tura tih an ni a, hemi hma hian an hriselna dinhmun dik tak chu Aizawl Civil Hospital-a Medical Board ten an enfiah dawn a ni.

Civil Hospital thuneitute hnen atanga thudawn danin, he board-ah hian Medical Superintendent Dr.Lalbiakkima chu chairman a ni a, Dr.Rosangluaia leh Dr.Lalbiakzuala te chu member an ni. Anni hian heng police 7 te insawiselna chu examin, an hriselna dinhmun hi an khawl hrang hrang hmangin an lo en anga, chuta an report dan a zir chuan Court hian thutlukna a siam dawn a ni.