Chief Minister Lal Than-hawla chu eiru-a puhna thubuaiah thiam lohna a nei tih finfiahna hmuh a ni lo a, a fihlim tih vawiin tlai khan corruption thubuai ngaihtuahtu Special Judge (Prevention of Corruption Act) Court chuan a puang.

 

awla thubuai ngaihtuahtu T. Saikunga, Special Judge (Prevention of Corruption Act) & District & Session Judge Court chuan nimin khan Court thuchhuak hi tawngkain a puang a. Lal Thanhawla leh a thurualpui nia puh Jodhraj Baid leh Pushpa Sharma te charge (Special Case No. 6/03, Special Trial no. 1326/96 u/s 120 B IPC read with Sec. 7, 12, 13 (1) (d), 13 (2) Prevention of Corruption Act) naah te thiam loh chantirna tur khawpin evidence tha a awm lo tih a sawi. He thubuai an charge-na hrang hrang thlirin, Court chuan a ‘aquit’ tih a sawi a. Court thuthluknaa lungawilo an awm chuan a ‘appeal’ leh theih thu a sawi nghal bawk.

Court-in thutlukna a puan lai hian thubuai neitu Mizoram Pradesh Congress Committee president, chief minister Lal Than-hawla pawh a awm a, chief minister a nih laia a thuneihna hmang dik lo leh, a thlabi hlawh pangngai bak sum diklo taka laluta puh niin, a thil neih hlut zawng leh a thla hlawh inmil loa puh a ni bawk.

He thubuai lo intanna hi kum 1997 daih tawh kha a ni a. National paper pakhat-in Baid Company ten ‘income tax’ an pe lo tih thu ziakin, Income Tax ten Baid company office leh an In, India ram hmun hrang hrang ami an dapnaah hetih laia Mizoram chief minister Lal Thanhawla hnenah hian sum thahnem tak an pe tih record tarlanna awm pawh an hreng tel niin tarlan a ni a. Hemi denchhen hian Rev.Zairema leh Bual-hranga ten Supreme Court-ah kum 1998 khan PIL an thehlut a. Hun engemawchen a rial hnuah Supreme Court hian state police-ah FIR thehlut turin PIL thehluttute chu thurawn a pe a. Hemi kum hian Rev Zairema hian Mizoram police-ah FIR thehlut tha lehin, case investigation officer pawh an inthlak nual hman a, April ni 14, 2003 khan case incharge officer John Neihlaia chuan chargesheet a thehlut ta a ni.

Chief minister Lal Thanhawla eiru-a puhna thubuai hi kum 10 chuang zet Court-ah hian a inchiah hman a. Thuhretu (withness) mi 56 koh an ni a, heng zingah hian boral tawhte leh an awmna chin hriat zawh loh mi 16 an awm a, Court-a exam tak tak chu mi 40 an ni a. Amah Lal Thanhawla pawhin Court-ah hian sawi tur a neihte Court-in zawtin a sawi tawh bawk.

Thubuai ngaihtuahtu Special Judge, Prevention of Corruption Act, T. Saikunga chuan Lal Thanhawla leh a thurualpui nia sawite puhna hrang hranga thuhretute thu a ngaihthlak atang leh document awm te atangin ‘criminal offense’ a nihna te, thuneihna hmangsual nia puhnate chu a fiah zo lo tiin, nimin tlai dar 4:00 khan chief minister Lal Thanhawla thiam lohna hmuh a ni lo tih a puang ta a ni, thudawnna chuan a ti.

Court thutlukna puan a nih hnu hian MPCC chuan Congress Bhavan-ah lawmthu sawina inkhawm an nei zui nghal a. Chief minister Lal Thanhawla chuan hnukulh teuh chunga thu sawiin, dikna chu a tlovin dawt erawh chuan ke a neih loh avangin a tlu leh mai thin tih a sawi a. He thutlukna hi ‘Dikna hi tunlai khawvelah a la lal a ni tih tidiktu a ni,’ a nih thu leh, Indian Judiciary chu a dikin a rinawm a, a zahawm a ni, a ti.

Lal Thanhawla chuan hnehna chu ama tih ni lovin, Pathian kuta awm a nih thu a sawi a. Eiru a puhna zawng zawngah a fihlim vek thu leh, kum 13 chhung chief minister a nih laia pawisa sen pawh a ei ruk ngai loh thu te sawiin,, “Sorkar pawisa reng reng hi sorkar pawisa a nih laiin ka khawih duh ngai lova; he ka thu buai ngaihtuah a nih chhung zawng hian ka theng a thawng a khawih ngai lo,” a ti a. Sual tinrenga hektute chu a huat loh thu te, an tih anga tih ve kher a duh ngai loh thu te leh, puh chhiatna leh harsatna chi hrang hrang a tawh lai pawha, a chunga rinna nghat tlat party mipuite chungah lawmthu a sawi bawk.