MZP chuan school hrang hrangin uniform an hak dan chungchangah, inenkawlna felfai leh him neih tul an ti a. School naupang hmeichhe pawnfen chhing lutuk leh mipa kekawr ha fual lutuk thin chuan naupangte-ah harsatna a siam thei niin an sawi.

 

Zirlaite uniform chung-changa harsatna awm thei chungchang hi nimina MZP executive meeting neihah sawiho a ni a. Meeting zawha thuchhuah an siamah chuan, “Hmeichhe pawnfen chhing lutukin naupangte nunah harsatna a thlen theih avang te, mipa kekawr hafual lutukin inthununna kawngah harsatna a thlen theih dan te hria in, hemi chungchangah hian sorkarin school hrang hrangte zawm tur dan duangchhuaka lekkawh turin MZP chuan Mizoram sorkar a beisei a ni, an ti.

Zirna In hrang hrangte chu nasa lehzuala zonunmawi inzirtir uar turin MZP hian an ngen tih an sawi a. Mahni hnamzia zahpui lova chawinung turin theihtawp chhuah thar tur leh,k mahni hnam aia hnamdang lam inzirtirna tam lutuk pawh tihtlem leh a tam thei ang ber mahni hnam lam thiam thei tura hmalak chhunzawm turin an ngen.

MZP executive meeting hi president VL Krosshnehzova’n kaihruaiin, school enrolment leh school in mil lo tamtak a awm thu te, hei hian zirlaite tan zirna kawngah harsatna a thlen theih tur khawpa school room chep lutuk te, hostel building te lutuk chhunga zirlaite tawt taka ekbeng chiam te, zirlaite fee chawi tam lutuk leh zirlaiten hostel-a lehkha zir tura an awm laia tui an chawi thin te, hmun hla tak taka insu tura an kalchhuak thinte chu him lo an ti a. Heng hi zirlaite chanvo rahbehna ang hiala an ngaih thu an sawi.

Hostel inenkawlna felfai lo tamtak, siamthat ngai engemawzat a awm tih MZP thuchhuah chuan a tarlang a. Hemi kawngah hian Mizoram sorkar chu rang taka a endik hna thawk a, enkawlna tur dan siam kawngah chak taka hma la turin sorkar an ngen bawk.