Mizoram Presbyterian Church-a thuneitu sang ber Synod Inkhawmpui vawi 86-na Mission Vengthlang Kohhran-a neih mekah vawiin khan Moderator thar Rev.C.Chawngliana kaihhruaiin rorel inkhawm neih tan a ni a, naktuka rorel inkhawmah vawiin lama rel zawh hman loh chhunzawmin, Presbytery hrang hrang atanga agenda lut ngaihtuah hman tura beisei a ni a, chung zingah chuan neih inang inkawp chungchang pawh a tel tih kan thudawnna chuan a sawi.

 

Synod khawmpui 2009-ah hian agenda 96 awmin agenda tesep thahnem tawk tak a awm bawk a. Heng zingah hian Aizawl Central Presbytery atanga thulut ‘Inkawp lo chi inkawp’ chungchang leh Aizawl Bethel Presbytery atanga agenda lut ‘Mipa leh mipa, hmeichhia leh hmeichhia inkawp, nupa anga khawsa te dinhmun enthat’ chungchangte pawh a tel.

Rorel inkhawm hi vawiin chawhma dar 10:00 khan tan a ni a, Moderator kalchhuak Rev.H.Lalchhanhima’n Moderator thar Rev.C.Chawngliana hnenah charge a hlan a. Moderator thar hian rorel inkhawm kaihruaiin, Pro-Pastor atan mi 12 lak thar an ni a, Pro-Pastor 14 te chu Pastor-ah nemngheh turin pawm an nih bakah an bial vawn turte pawh tihfel nghal a ni.

Hei bakah hian Pastor leh Pro-Pastor hna thawk mek engemawzat an awmna hmun siamrem a ni a. Pro-Pastor 2 te banna pawmsak an ni a, Pastor 1 (native pastor) chu a banna pawmsak a nih mai bakah a ‘ordination’ pawh hlihsak nghal a ni a. Mizoram chhungah Pastor bial thar 4 leh Mizoram pawnah 8 hawn remtih a ni bawk a. Mizoram chhunga bial thar hawn tura pawmte chu ITI Bial, Khawzawl Dinthar Bial, Zonuam Bial leh Rengtekawn Bial te an ni.

Kum 2010-a Pastoral Ministry thupui atan ‘Rorelna Dik’ (Amosa 5:24) chu pawm a ni a. Nakkum Synod Inkhawm chu Zarkawt Presbyterian Kohhran Biak Inah December ni 1-12 chhunga neih tura rel a ni. Heta Synod Puipa tura thlante chu : Moderator (elect) - Rev.C. Lalsangliana, Secretary (Sr.) - Upa Vanlalhuma, Secretary (Jr.) - Rev.PC Pachhunga, Finance Officers - Rev.Zosangliana leh Rev.Dr.Lalhmangaiha, Statistician - Upa Ramnghinglova te an ni.

Tun tum Synod Inkhawmpuiah hian nimin thleng khan palai 1742 an kal a, vawiin hian rorel inkhawm chhunzawm lehin, thu ngaihtuah tura chhawpchhuah (General Agenda) zingah Reserved Forest siam leh tura sorkar ngen chungchang, Presbyterian Kohhran tina Committee Member ten Political Party-ah nihna pawimawh chelh tawh loh nise tihte, media-in a thalo zawnga mihring nun a kaihhruai dan zirhchian chungchang te, zu leh ruihtheih thil hrang hrang do kawngah Synod-in nasa zawkin hma la rawh se tihte, fa 5 aia tam neite hamthatna pek chungchang te leh Bairabi Hydel Project siam chungchangte a tel a ni.